Ribe, ca. 1005 Originaltekst, LatinXIII: I. Iisdem temporibus Popponi Rimbrandus, Harico Marcus pontificii religione successit;pro Lefdago Fulbertus sacerdotio fulsit, post quem Othincarus Albus, splendidissimo loco natus, insulas sumpsit. Cuius liberalis in Deum animus, ne parvula quidem sibi summa retenta, amplissimum patrimonium necessariis templorum usibus erogavit cellasque ante id rei familiaris inopes uberrimis agris ac latifundiis locupletes effecit, adeo ut excellentissimæ totius Iutiæ ecclesiæ, quicquid pæne prædiorum possident, a religiösa eius donatione perceperint. Itaque propior publicæ devotioni quam privatæ facultati solidæque magis quam fluxæ laudis appetens, momenta neo rerum impendio mansuras animi delicias comparavit seque patrimonii quam religionem rei familiaris inopem esse maluit, ad eum hereditatis suæ honorem transferens, a quo pia dona perpetuis bonis rependenda cognoverat. Nec possessioncm sacris impendisse contentus, ut omnes virtutis partes ac numeros exsequeretur, etiam rerum beneficiis virtutum adiumenta subtexuit. Siquidem Syalandiam et Scaniam officio piæ eruditionis aggressus, mirificum sacri dogmatis auctorem agere cæpit. Ac ne parcius animi quam corporis officium adminisraret, tantum se in amplificanda religione gessit, quantum egerat in locupletanda, pro quo patrimonium erogaverat, etiam morte paratus occumbere. | Kilde:Saxonis Gesta Danorum 284–85. Emneord:Gejstlige institutioner og personer - Biskop |
