Roskilde, 1154 Originaltekst, LatinIta alieno consilio spreto, proprium amplexatus, Roskyldiæ hostem opperiri constituit. Rarescentibus alimentis, regios vicos complures comparandi sumptus gratia venditabat. Tandem multi ruris absumpto pretio, cum exercitum nimiis impensis onerosum dimissurus videretur, Eskillus, defectionem providens, artem excogitavit, qua periculum ad fructum converteret. Primum enim ampla defectionis præmia ab adversariis occulte paciscitur. Mox cum conterraneis regem accedens, alimentorum inopiam queritur; dimittat, precatur, quos pascere nequeat, præsertim pietatis ac necessitudinis iura violaturos, si in cives ac propinquos ex adverso contractos pugnatum issent. His dictis tamquam defectionis ratione reddita, cum cohorte Scanica regia excedit, subiungente Suenone dignum eum, qui defectionis pænas capite lueret. Sed hunc regis furorem sanior arbitrorum sententia propulit, imminentis belli auspicia scelere et sacrilegio prohibentium esse sumenda. | Kilde:Saxonis Gesta Danorum s. 398. Emneord:Konger og dronninger - Bystyret og andre verdslige institutioner og personer - Ridder og ridderorden Byliv - Krigshandlinger og leding Andre udgaver af denne tekst:Roskilde 1154 Saxo - s. 397. Roskilde 1154 Saxe Olrik - s. 227 - 228. Roskilde 1154 Saxe Olrik - s. 229 - 230. |
